I шатны сонгон шалгаруулалт
: 2018.01.17 | : 0

59 INTERNATIONAL MATHEMATICAL OLYMPIAD (IMO)

 

I шатны сонгон шалгаруулалт

 

IMO-ийн тухай

 

IMO буюу Олон Улсын Математикийн Олимпиад (ОУМО) нь манай гараг дээрх хамгийн нэр хүндтэй, хамгийн олон сурагчийг хамардаг оюуны арга хэмжээ юм. Орчин үеийн соёлт хүн тѳрѳлхтний түүхэн дэх хамгийн анхны оюуны наадам математикийн олимпиад байсан бөгөөд 1894 онд авьяастныг нээх, математик сэтгэлгээний гоо сайхныг түгээх зорилгоор Унгар улсад зохион байгуулагдаж байжээ. 1959 онд олон улсыг хамарсан анхны математикийн олимпиадыг социалист системийн орнуудын хүрээнд Румын улс санаачлан зохион байгуулснаар өнөөдрийн ОУМО-ын эхлэл тавигдсан байна. Тэр цагаас хойш ОУМО нь 5 тивийн боловсролоороо тэргүүлж буй 100 гаран улс оролцдог томоохон арга хэмжээ болон өргөжжээ.  

            ОУМО-д оролцож буй сурагчид дараалсан 2 өдөр, өдөр бүр 3 бодлого, нийт 6 бодлого бодож өрсөлддөг. 1:2:3 харьцаагаар алт, мөнгө, хүрэл медалийг олгодог бөгөөд нийт оролцогчдын 50 хүртэлх % нь авсан онооныхоо эрэмбээр медаль хүртдэг. Медаль аваагүй боловч бүтэн бодлого бодсон сурагчдад тусгай байрын шагнал олгодог.

 

IMO 2018

 

2018 оны 7 сарын 3-14 хооронд Румын улс Cluj Napoc хотдоо 59 дэх удаагийн Олон Улсын Математикийн Олимпиадыг хүлээн авна. Румын улс 1959, 1960, 1969, 1978, 1999 онуудад ОУМО-г эх орондоо зохион байгуулж байсан байна.                           Албан ёсны вэб хуудас http://www.imo2018.org/index.html

IMO 2018-д Монгол улсыг төлөөлөн уламжлал ёсоор 6 сурагчийн бүрэлдэхүүнтэй баг оролцоно. Оролцох багийн сонгон шалгаруулалт 2 үе шаттай явагдах бөгөөд сонирхсон сурагч бүр анги хамаарахгүйгээр сонгон шалгаруулалтад оролцох боломжтой. I шатны сонгон шалгаруулалт тест хэлбэрээр (холимог) 2 удаа явагдаж улсын шигшээ багт багтах 20-30 сурагчийг шалгаруулна. Эдгээр сурагчдын дунд II шатны сонгон шалгаруулалтыг явуулж ОУМО-д оролцох 6 сурагчийг шалгаруулна. II шат уламжлалт хэлбэрээр 3 удаагийн сорилтой ба 3 дахь удаагийн сорил нь УМО-ын XII ангийн ангилал байна.  

 

I шатны эхний сонгон шалгаруулалт 2018 оны 2 дугаар сарын 4-ний өдрийн 10 цагт эхэлнэ.

Улаанбаатар хотод:

            УБ хотын 1 дүгээр сургууль дээр явагдана.

            Бүртгэл: УБ хотын 1 дүгээр сургууль дээр 2018 оны 2 дугаар сарын 3-ний өдөр

Орон нутагт:

            ММОХ-ны төлөөлөгч багш нар зохион байгуулна.

Оролцогч бүр 5000₮ төлнө. Энэ мөнгө үйл ажиллагааны зардалд (ассистант багш, материал боловсруулах, засах, цаас болон бусад) зарцуулагдана.