ОУМО-59 тайлан

ОУМО-59 тайлан

2017-2018  оны хичээлийн жилд ММОХ-ТББ нь орон нутаг, боловсролын шат шатны байгууллагуудын дэмжлэгтэйгээр гишүүд, математикийн багш нар, ажил хариуцсан мэргэжилтэнүүд, ивээн тэтгэгчидтэй хамтран

• Бүсийн математикийн III олимпиад,

• Хот/аймгийн олимпиад,

• Европын Охидын Математикийн Олимпиадад оролцох,

• МУГБагш У.Доёдын нэрэмжит Улсын математикийн 54­-р олимпиад,

• Олон Улсын Математикийн 59-р Олимпиадад (ОУМО-59) оролцох

ажлуудыг амжилттай зохион байгуулж гүйцэтгэлээ. Тус хорооны бүтэн жилийн ажил бүсийн олимпиадаар эхэлж ОУМО-д багаа оролцуулснаар өндөрлөдөг. Тухайн жилийн олон улсын олимпиадад оролцох багийн ахлагч, дэд ахлагч нар эдгээр ажлыг хариуцан гүйцэтгэдэг юм.

Сорил:  Олон Улсын Математикийн 59-р Олимпиадад Монгол улсыг төлөөлөн оролцох сурагчдыг сонгон шалгаруулах сорил 2018 оны II сараас V сарын хооронд орон даяар ЕБС-ийн сурагчдын дунд 2 үе шаттайгаар явагдаж дүнгээ гаргасан. I шатнаас шалгарсан сурагчид 2 удаагийн тус бүр  5 хоногийн сургалтад хамрагдахын зэрэгцээ  уламжлалт хэлбэрээр явагдсан II шатны 3 удаагийн сорилд (сорил бүр дараалсан 2 өдөр) оролцож өрсөлдсөн. II шатны 3 дахь сорил болох Улсын Математикийн 54-р Олимпиадын XII ангийн ангиллын дүнг нэгтгэснээр

• М.Лханаажав (Олонлог сургууль),

• М.Өнөболд  (УБ, 1-р сургууль),

• Х.Санжаахүү (Хөвсгөл),

• М.Мишээл (Шинэ Монгол сургууль),

• Б.Батмэнд (УБ, 1-р сургууль)

• Б.Төрбат (Орчлон сургууль),

нарын шилдэг 6 сурагч ОУМО-59-д оролцохоор шалгарсан. Сурагчдыг сонгон шалгаруулах эхний шатны сорилуудыг Г.Баярмагнай (МУИС), Ү.Отгонбаяр (Мат.хүрээлэн), Д.Даянцолмон (МУИС) нар, дараагын шатны  сорилуудыг Г.Баярмагнай, Ү.Отгонбаяр нар зохион байгуулж хариуцан ажиллаа. Материалыг засах ажилд Б.Баяржаргал (МУИС), Г.Батзаяа (Мат.хүрээлэн), Т.Базар (Мат.хүрээлэн), Э.Оргил Эрдэнэ (оюутан), Эрдэнэбаяр (оюутан) нар оролцлоо.

Шалгарсан сурагчдын II шатны эхний 2 сорилын материалуудтай дараах хуудснаас танилцана уу!  http://www.mmo.mn/m/6/show/115

Бэлтгэл: ОУМО-59-д оролцох сурагчдын бэлтгэл V сарын 28­-наас VII сарын 5­-ны хооронд Таван богд плаза төвийн 203 тоот өрөөнд тогтмол явагдаж Др. Г.Баярмагнай, Др. Б.Батцэнгэл (ММОХ), Др. Ү.Отгонбаяр, Др. Г.Батзаяа, Др. Б.Батзориг (Мат.хүрээлэн) нар хичээл зааж багийг бэлтгэлээ. Багийн бэлтгэлийг хангахдаа IMO-ын өмнөх онуудын шилэгдсэн бодлогууд (shortlist), EGMO­-ийн  (Европийн охидын математикийн олимпиад) бодлогууд дээр анализ хийх, ОУМО-д амжилттай оролцдог орнуудын шилэгдсэн бодлогууд дээр тулгуурлан бэлтгэсэн бие даалтын материал дээр сурагчдыг ажиллуулахын зэрэгцээ

• Тогтсон хугацаанд “Mock exam” авах,

• Олон улсын олимпиадын А1, В1 түвшний бодлогууд дээр ажиллах,

• Өмнөх онуудын ОУМО-ын бодлогуудын “marking scheme” (оноо өгөх ерөнхий аргачлал)-тэй танилцаж оноо цуглуулах

зэрэгт анхаарч ажиллав.

ОУМО-59-д оролцсон байдал: Олон улсын математикийн 59-р олимпиад 2018 оны 07 дугаар сарын 04-14 хооронд Румын улсын Клуж Напока хотод ёслол төгөлдөр зохион байгуулагдаж өндөрлөлөө. Энэ жилийн олимпиадад 107 орны нийт 594 сурагч, тэдний дотор манай улсын 6 сурагч оролцов. Олон улсын математикийн олимпиадыг анхлан санаачилж эхлүүлсэн Румын улс энэ удаагийн олимпиадад онцгой анхаарал хандуулж байгаа нь нээлт, хаалт, болон бусад үйл ажиллагаанаас тодорхой харагдаж байлаа. Олимпиадын нээлтийн үйл ажиллагаанд Румын улсын ерөнхийлөгч хүрэлцэн ирж оролцсон бөгөөд  дэд ерөнхий сайд болон боловсролын сайд, тус улсын математикийн нийгэмлэг, Клуж Напока хотын захиргаа ОУМО-59-ыг амжилттай зохион байгуулахад онцгой анхаарал хандуулсан.

ОУМО-59-д оролцсон Монголын баг 1 мөнгө, 5 хүрэл медаль хүртэж багийн бүх гишүүд бүгд медаль хүртсэн анхны түүхэн амжилтыг үзүүлж багийн дүнгээр Бразил, Энэтхэгийн багуудтай ижил 132 оноо авч 28 дугаар байранд орсон.

Contestant	P1	P2	P3	P4	P5	P6	Total	Rank		Award
								Abs.	Rel.
Team results	42	28	0	42	18	2	132	28	74.53%	S, B, B, B, B, B
Lkhanaajav Mijiddorj	7	7	0	7	7	0	28	87	85.50%	Silver medal
Unubold Munkhbat	7	7	0	7	2	0	23	157	73.69%	Bronze medal
Turbat Battsengel	7	2	0	7	7	0	23	157	73.69%	Bronze medal
Sanjaakhuu Khenzii	7	7	0	7	0	1	22	174	70.83%	Bronze medal
Misheel Otgonbayar	7	3	0	7	2	0	19	215	63.91%	Bronze medal
Batmend Batsaikhan	7	2	0	7	0	1	17	250	58.01%	Bronze medal
Team results	42	28	0	42	18	2	132	28	74.53%	S, B, B, B, B, B

ОУМО-59-ийн зардал: ОУМО оролцоход багийн гишүүдийн тийзний зардал, эрүүл мэндийн даатгал, визны хураамж, зарим тохиолдолд зам хоногийн зардал гардаг. Мөн тухайн жилийн улсын математикийн олимпиадын гарын авлагыг бэлтгэх, хэвлүүлэх зардал гардаг. Энэ жилийн хувьд эдгээр зардлууд дараах байгууллага, хувь хүмүүсийн оролцоотойгоор  шийдвэрлэгдлээ.Үүнд:

1. ММОХ-ТББ-ын удирдах зөвлөлөөс дараах зардалыг санхүүжүүлж дэмжлэг үзүүлллээ. Үүнд:

   1. ОУМО-59-д оролцох багийн замын зардалд зориулж БСШУСЯ-наас хуваарилсан төсөв энэ жил бас л хүрэлцэлгүй 1.111.050₮ дутсаныг шийдвэрлэсэн.

   2. Багын ахлагч, дэд ахлагч, сурагчдын зам хоногын зардалд 1.300.000₮-ийг тэтгэлэг хэлбэрээр олгосон.

   3. Улсын математикийн 54-р олимпиадын бодлогуудын бодолтыг цэгцлэх, орчуулах, редакторлах зардалд 900.000₮-ийн санхүүжүүллээ.

2. МУИС-ийн ШУС улсын математикийн 54-р олимпиадын англи гарын авлагыг хэвлэх зардал (250.000₮)-ыг шийдвэрлэж өгсөн.

3. Румын улсын өргөмжит консул Ө.Одонсүрэнгийн дэмжлэгтэйгээр ОУМО-59-д оролцох багийн гишүүд визны хураамжаас бүрэн чөлөөлөгдсөн. Консулын зүгээс багийн гишүүдийн визийг богино хугацаанд шийдвэрлэх асуудалд дэмжлэг үзүүлж ММОХ-той хамтарч ажилласан гэдгийг онцолж байна.

ОУМО-59-д оролцох замын зардлыг шийдвэрлэсэн БСШУСЯ, үйл ажиллааны зардалд дэмжлэг үзүүлсэн ММОХ-ТББ-ын ерөнхийлгч Ч.Анар (Анд Глобал ХХК), дэд  ерөнхийлгч Ж.Оюунгэрэл (Петровис ХХК), дэд ерөнхийлөгч Д.Энхтүвшин, гарын авлага хэвлүүлэх зардлыг шийдвэрлэсэн МУИС, визны асуудалд дэмжлэг үзүүлсэн өргөмжит консул Ө.Одонсүрэн нарт баярлаж талархаж байгаагаа илэрхийлье.

ОУМО-59-ийн сэдэв: Олимпиадад оролцогчид дараалсан 2 өдөр, өдөр бүр 4 цаг 30 минутын хугацаанд 3 бодлого бүхий сэдвээр өрсөлддөг. Сэдэвт багтаж буй 3 бодлого хөнгөн, дунд, хүнд гэсэн 3 түвшинд ангилагддаг бөгөөд Алгебр, Комбинаторик, Геометр, Тооны Онол гэсэн 4 төрөлд хамаарагддаг. Энэ жилийн олон улсын математикийн олимпиадад 40 гаран орны 170 орчим бодлого дэвшигдсэнээс манай улсын 2 бодлого мэргэжлийн комиссоор шилэгдсэн 28 бодлогод багтаж “IMO-59 Shortlist”-д хэвлэгдлээ. Үүнээс тооны онолын ангилалд хамаарах бодлого ОУМО-59-ийн 2 дахь өдрийн 2-р бодлогоор сонгогдлоо. Энэ бүхэн нь манай орны багш нар улсын олимпиаддаа зориулж зохиож буй бодлого, бодлогын чанар чансаа олон улсын түвшинд явагдаж байгааг нотолсон нотолгоо боллоо.

 

Мөн улсын математикийн 54-р олимпиадад дэвшүүлсэн бодлогуудаас шилэгдэн сэдэвт багтсан бодлогуудыг орчуулж гарын авлага бэлтгэн бусад орны багуудад тараасан. Энэ гарын авлагыг Г.Баярмагнай, Ү.Отгонбаяр, Б.Батзориг  нар бэлтгэлээ.

ОУМО-60: Олон улсын математикийн 60-р олимпиад Их Британи Умард Ирландын нэгдсэн вант улсын Батт хотод 2019 оны 7 сарын 12-22-ны хооронд зохион байгуулагдахаар шийдвэрлэгдсэн болно. 

ММОХ-ны гүйцэтгэх захирал Др. Г. Баярмагнай (МУИС)

2018 оны 9 сарын 21 өдөр

Нийтэлсэн: 2018-09-21, Сүүлийн засвар: 2018-09-20