55 дахь удаагийн Улсын Математикийн Олимпиад
55 дахь удаагийн улсын математикийн олимпиад 2019 оны 4 сарын 29-нөөс 5 сарын 4-ныг хүртэлх өдрүүдэд Улаанбаатар хотод зохион байгуулагдана.
Энэ жил 55 дахь удаагийн Улсын Математикийн Олимпиад зохион байгуулагдах гэж байна 55 дахь удаагийн улсын математикийн олимпиад 2019 оны 4 сарын 29-нөөс 5 сарын 4-ныг хүртэлх өдрүүдэд Улаанбаатар хотод зохион байгуулагдана. Ардын багш Ү.Маам захиралтай улсын тэргүүний “Шинэ үе” сургуулийн хамт олон УМО-55-ыг хүлээн авахаар Монголын Математикийн Олимпиадын Хороотой хамтран бэлтгэл ажлаа эхлүүлсэн байна. Энэ удаагийн улсын олимпиадын гол онцлог нь нийслэлийн дүүргүүдийг төлөөлсөн багууд бие даан орох боломжтой болсон байна. Ингэснээр нийслэлийн захын сургуулиудын авьяаслаг багш, сурагчдын математик хөгжилд томоохон үр нөлөө үзүүлнэ хэмээн ММОХ-ны зүгээс үзэж байна. Математикийн олимпиадад бэлтгэж уйгагүй хичээллэснээр математик сэтгэлгээнд суралцаж аливаа зүйлд баригдахгүй чөлөөтэй, бүтээлчээр сэтгэх, асуудлын шийдлийг хайх арга барил эзэмшдэг. Хамгийн гол нь хүн өөрийн хүсэл сонирхлоороо ямар нэгэн дарамт шахалтгүй орчинд суралцаж байж амжилт гаргах боломж нь нээгддэг ажээ. Математикаар хичээллэж олимпиад, уралдаанд амжилттай оролцдог сэтгэх чадвар нь хөгжсөн математик суурьтай сурагчид физик, хими, биологи, мэдээлэл зүйн чиглэлээр амжилт үзүүлэх боломж өндөр байдаг байна. ММОХ-ны зүгээс тэдний үйл ажиллагаанд хөрөнгө оруулалт хийж дэмжин ажиллаж байгаа спонсорууд, олимпиадад оролцогч нийт багш, сурагч, тэдгээрийн эцэг эхчүүдэд чин сэтгэлийн талархал илэрхийлж байна. 2018 онд “Анд Глобал” компани 50 сая төгрөг, “Петровис” ХХК-ны ТУЗ-ийн дарга Ж.Оюунгэрэл 25 сая төгрөг, MCS группийн дэд ерөнхийлөгч Д.Энхтүвшин 25 сая төгрөгийг математикийн олимпиадын үйл ажиллагааг дэмжин хандив өргөснийг хороо онцолж байна. “Математик бүх шинжлэх ухааны хаан юм аа” гэж алдарт математикч Карл Фридрех Гаусс хэлсэн байдаг. Үнэхээр ч математик нь байгалийн шинжлэх ухаан, техник инженерчлэлийн салбарын суурь болдог онцлогтой тул ММОХ-нд оруулсан дээрх эрхэмүүдийн дэмжлэг математик төдийгүй бусад олон салбарт үр шимээ өгнө гэдэгт итгэлтэй байна.
Нийтэлсэн: 2018-10-01, Сүүлийн засвар: 2018-10-01