Баримтлах дүрэм
Ерөнхий шаардлага
- Бодолтын цаг эхлэхээс 20 минутын өмнө гэхэд бодолтын танхимд суудлаа эзэлсэн байна. Бодлого задарснаас хойш оруулахгүй.
- Бодолтод зөвхөн үзэг, бал, шугам, гортиг, баллуур гэх мэт бичих болон зурах хэрэгсэл ашиглаж болно.
- Компьютер, гар утас, таблет, тооны машин, ухаалаг цаг болон бусад цахим төхөөрөмж болон холбооны хэрэгсэл ашиглахыг хориглох ба бодолтын танхим руу авч орохгүй байна.
- Овог, нэр, ID, бодлогын дугаар зэрэг мэдээллийг бодолтын цаг дуусахаас өмнө бодолтын цаасан дээр бичсэн байх шаардлагатай ба мэдээлэл дутуу бол засалт хийгдэхгүй байх эрсдэлтэй болохыг анхаарна уу.
- Геометрийн бодлогоны зураг зураагүй бол бодолтоос 1 оноо хасна.
- Үнэр, чимээ багатай хөнгөн идэх, уух зүйлс бодолтын танхимд авч орж болох ба бодолтын үеэр хэрэглэж болно.
- Бие засахдаа хянагчид мэдэгдэн нэг нэгээрээ гарна. Эхний 1 цаг болон сүүлийн 30 минутад бодолтын танхимаас гарахгүй.
- Бодолт эхэлснээс хойш 30 минутын хугацаанд бодлогын өгүүлбэртэй холбоотой асуултыг бичгээр асууж болно.
- Бодолтын цаасны зөвхөн нүүрэн талд бичих ба ард талд бичсэн бичвэрт засалт хийхгүй.
- Бодолтын цаасан дээр нэгээс олон бодлогын бодолтыг хольж бичихгүй.
- Бодолтын цаасан дээр хуудасны дугаар, бодолтоо дуусаад тухайн бодлогын бодолтын нийт хуудасны тоог бичнэ.
- Бодолт дууссан бол бодолтын цаасаа хянагчид тоолон хүлээлгэж өгөх ба хяналтын хуудас дээр гарын үсэг зурж баталгаажуулна.
Ёс зүйн шаардлага
- Бодолтын цаг эхэллээ гэж зарлах хүртэл бодлого харахгүй бөгөөд бодолтын цаг дууслаа гэж зарласны дараа бодолтын цаасанд нэмэлт өөрчлөлт оруулахгүй.
- Бодлогоо бие даан бодох ба бусдаас аливаа хэлбэрийн тусламж авахыг хориглоно.
- Бодолт болон хамгаалалтын үеэр хянагч, зохион байгуулалч болон хорооны гишүүдтэй хүндэтгэлтэй харьцаж, тэдний зүй ёсны шаардлагыг биелүүлнэ.
- Дээрх заалтуудыг зөрчсөнтэй холбоотой гомдлыг Математикийн олимпиадын дэд хороогоор авч хэлэлцэх ба тодорхой хугацаагаар олимпиадын үйл ажиллагаанд оролцох эрхийг хасах хүртэл арга хэмжээ авч болно. Дэд хорооны шийдвэр эцсийн байна. Ноцтой тохиолдолд хууль хяналтын байгууллагад хандана.
Сүүлийн засвар: 2026-08-12, Нийтэлсэн: 2026-08-12