Аймаг, дүүргийн олимпиадын дүн, дараагийн шатны эрх олголтын тухай
II давааны I шат буюу аймаг, дүүргийн олимпиадын дүн болон багш, сурагчдын материалыг нийтэд ил тод байршуулах ажил үндсэндээ дуусаж, дараагийн шатны эрх олгох ажил хүлээгдэж байна. Олимпиадын дүнг 2-р сарын 10-ны өдөр албан ёсоор зарлахаар төлөвлөсөн болно.
Нийслэлийн дүүргүүдийн хувьд сурагчдын материалыг онлайн байршуулах ажил 70 орчим хувьтай, нийт аймаг, дүүргийн хэмжээнд 50 орчим хувьтай хийгдээд байна. Энэ жил бүсийн жагсаалтыг албан ёсоор гаргаагүй тул аймгуудаас материалыг заавал ирүүлэх шаардлага тавиагүй. Мөн Сонгинохайрхан, Багануур, Багахангай, Налайх дүүргүүдээс дараагийн шатны эрх авах оролцогч гараагүй тул эдгээр дүүргийн сурагчдын материалыг илгээхийг шаардаагүй болно.
Гэсэн хэдий ч олимпиадын бүх үе шатыг ил тод, нээлттэй зохион байгуулах нь чухал тул бүх зохион байгуулагчид сурагчдын материалыг системд байршуулахыг анхаарах нь зүйтэй. Энэ нь олимпиадын шударга байдлыг хангахаас гадна оролцогчдод өөрсдийн алдаанаас суралцах боломжийг олгох чухал ач холбогдолтой юм.
Олимпиадын дүнг бүрэн гүйцэд системд оруулах нь дараа, дараагийн жилүүдийн бодлогын түвшинг оновчтой тогтоох, зохион байгуулалтын сайжруулалтыг хийх зэрэгт чухал үүрэгтэй. Гэвч зарим аймаг, дүүрэг нийт оролцогчдын дүнг ирүүлээгүй, оролцогчдын ID дугаарыг дутуу оруулсан зэрэг дутагдал гарсан байна. Энэ нь туршлага дутмаг, зохион байгуулалтын хангалтгүй байдлаас үүдэлтэй гэж үзэж болох юм.
Иймд улсын олимпиадад удаа дараа амжилттай оролцож, медаль хүртсэн туршлагатай багш нар өөрсдийн аймаг, дүүргийн олимпиадыг удирдан зохион байгуулахад идэвхтэй оролцохыг хорооны зүгээс уриалж байна. Мөн цаашид Улсын Математикийн Олимпиадын үеэр зохион байгуулагчдад зориулсан чиглүүлэх сургалтыг тогтмол явуулах нь зүйтэй гэж үзэж байна.
Олимпиадын засалтыг хорооны гаргасан дүгнэх аргачлалын дагуу хийх ёстой. Гэсэн хэдий ч зарим аймаг, дүүрэгт энэ тал дээр алдаа дутагдал гарсан тухай мэдээлэл ирсэн. Тиймээс цаашид үнэлгээний нэгдсэн аргачлалыг илүү нарийн мөрдөж ажиллах нь чухал байна. Хэдий тийм боловч олимпиадын материал зассан багш нар өөрсдийн мэдлэг чадвараа дайчлан, шударгаар үнэлгээ хийсэн гэдэгт хорооны зүгээс итгэлтэй байна. Алдаа дутагдлыг багасгахын тулд бид цаашид ч хяналтаа сайжруулан ажиллах болно.
Нийт оролцогчдод дараагийн олимпиаддаа өндөр амжилт гаргахыг хүсэн ерөөе!
Сүүлийн засвар:2025-02-09, Нийтэлсэн: 2025-02-09