ММО-63, I даваа: оролцох заавар
ММО-63-ын I даваа буюу сургуулийн олимпиад 2026 оны 10-р сарын 28-ны өдөр (Лхагва) танхимаар, сурагч бүр өөрийн сургууль дээр оролцоно. Сурагч, эцэг эх, сургуулийн бүртгэгч багш нарт зориулсан ерөнхий зааврыг доор нэгтгэлээ. Олимпиад дуустал нэмэлт мэдээллийг сайтаас тогтмол шалгаж байна уу.
Энэ жилийн гол онцлог
Аймаг, дүүргийн олимпиадад (II давааны I шат) оролцох эрхийг аймаг, дүүргийн нэгдсэн жагсаалтаар бус сургууль тус бүрийн квотоор олгоно. Сургууль бүр I давааны дүнгээр, өөрийн квотын хүрээнд II даваанд оролцох сурагчдаа тодруулна.
- Сургуулийн квот = сургуулиас олгох эрх (ангилал бүрд дүүрэгт 3, аймагт 2 сурагч) + квотоор олгох нэмэлт эрх (сүүлийн 3 жилд аймаг, дүүргийн олимпиадад тус сургуулиас дүүрэгт эхний 50, аймагт эхний 20 байрт шалгарсан сурагчдын дундаж тоо).
- Сургуулийн квотыг сургуулийн «Бүх сурагчид» хуудсанд ангилал бүрээр, мөн квотын хуудсанд аймаг, дүүргээр нь харж болно.
- Тиймээс I даваанд тухайн сургууль дээр бүртгэлгүй сурагчийн дүн тооцогдохгүй, II даваанд шалгарах боломжгүй. Сурагчдаа бүрэн бүртгэж, хариултыг нь алдаагүй оруулах нь сургуулийн үүрэг.
Хугацаа, ангилал
| Ангилал | Анги | Бодлого | Бодох хугацаа (УБ цаг) |
|---|---|---|---|
| C | 5–6 | 10 | 15:00–17:00 (2 цаг) |
| D | 7–8 | 10 | 15:00–17:00 (2 цаг) |
| E | 9–10 | 12 | 15:00–17:30 (2 цаг 30 мин) |
| F | 11–12 | 12 | 15:00–17:30 (2 цаг 30 мин) |
- Сурагч өөрийн ангийн ангилалд, эсвэл түүнээс дээш ангилалд оролцож болно. Жишээ нь 6-р ангийн сурагч C, D, E, F-ийн аль нэгэнд оролцож болох ч 7-р ангийн сурагч C ангилалд оролцохгүй. Гэхдээ сургуулийн бүртгэгч багшид аль ангилалд орохоо урьдчилж мэдэгдэж бүртгэлд зохих өөрчлөл оруулсан байна.
- Олимпиад нөхөх тест хэлбэртэй. Бодлого бүрийн хариу натурал тоо байх бөгөөд сурагч зөвхөн тоон хариугаа хариултын хуудсанд бичнэ.
- Засалтыг mmo.mn систем хийнэ.
Сурагч, эцэг эхчүүдэд
- Бүртгэлээ шалгах. registration@mmo.mn хаягаас таны имэйлд ирсэн «ММО-63 I даваа» имэйлийн хувийн холбоосоор орж аккаунтын мэдээлэл, I давааны бүртгэлээ шалгана (нэвтрэх шаардлагагүй). «Бүртгэлгүй» гэж харагдаж байвал «Бүртгэгч багшид хүсэлт илгээх» товчийг дарна (10-р сарын 25-наас өмнө). Сургуулийн бүртгэгч багш баталснаар бүртгэл баталгаажна.
- Имэйл ирээгүй, аккаунтгүй бол сургуулийнхаа математикийн багш эсвэл бүртгэгч багшид хандана уу. Бүртгэгч багш сурагчийг системд шууд бүртгэх боломжтой.
- ID-гаа мэдэж очих. Хариултын хуудсанд сурагч mmo.mn дахь өөрийн ID-г бичнэ. ID буруу бичигдвэл дүн системд орохгүй байх эрсдэлтэй. I даваанд оролцоход сурагч системд өөрөө нэвтрэх шаардлагагүй, нууц үгээ мэдэхгүй байсан ч оролцож болно.
- Олимпиадын өдөр харандаа, бал, баллуур, шугам, гортиг, ноорог цаас авч очно. Тооны машин, гар утас, ухаалаг цаг, таблет, ном, дэвтэр хэрэглэхгүй. Бусадтай ярилцах, хамтарч бодохыг хориглоно.
- Сургуулийн олимпиадыг тухайн сургуулийн ажлын хэсэг зохион байгуулна. Танхим, цагийн хуваарийн дэлгэрэнгүйг сургуулиасаа лавлана уу.
Сургуулийн бүртгэгч багш, ажлын хэсэгт
Олимпиадаас өмнө
- mmo.mn-д нэвтэрч «Миний сургуулиуд» цэснээс сургуулийнхаа «Бүх сурагчид» хуудсыг нээнэ. Нууц үгээ мартсан бол энд дарж шинэчилнэ.
- Сурагчдын ирүүлсэн хүсэлтийг («Бүртгэлгүй» төлөвтэй мөрүүд) «Бүртгэх» эсвэл «Бүгдийг батлах» товчоор баталгаажуулна. Бүгдийг батлахаас өмнө жагсаалтыг нягтална уу. Өөр сургуулийн сурагч хүсэлт илгээсэн байж болно.
- Аккаунттай сурагчийг «Бүртгэлтэй сурагч хайх» хэсгээс нэр эсвэл ID-аар хайж нэмнэ. Аккаунтгүй сурагчид «Шинээр бүртгэл үүсгэх» хэсгээс бүртгэл үүсгэнэ. Өөр сургуульд бүртгэлтэй сурагчийг «Шилжүүлэх» үйлдлээр шилжүүлэх хүсэлт илгээнэ (хүлээн авах сургуулийн бүртгэгч батлана).
- Бүртгэлээ 10-р сарын 26-наас өмнө дуусгана уу. Хариуны нэгтгэлд зөвхөн бүртгэлтэй сурагчдын дүн орно.
- Ангилал бүрийн хариултын Excel загварыг сургуулийн хуудасны олимпиадын хэсгээс «Загвар татах» товчоор татаж, бүртгэлтэй сурагчдынхаа ID зөв эсэхийг урьдчилан шалгана.
- Сэдэв хүлээн авах сувгуудаа урьдчилан шалгана: бүртгэгч багш mmo.mn-д нэвтэрч чадаж байгаа эсэх, сургуулийн удирдлагын бүртгэлтэй имэйл зөв, ажиллаж байгаа эсэх (хайрцаг дүүрсэн, Spam хавтас), аймаг, дүүргийн олимпиад хариуцсан мэргэжилтний холбоо барих мэдээлэл.
- Нэг ангилалд оролцох сурагчид нэг ширээнд зэрэгцэж суухгүй байхаар суудлыг урьдчилан бэлдэнэ.
- Зохион байгуулагч багш нарт зориулсан онлайн уулзалт: 10-р сарын 22-нд 20:00-21:00, линк: зарлана.
Олимпиадын өдөр
- Олимпиадын сэдвийг 14:00 цагт дараах 3 шугамаар зэрэг хүргүүлнэ. Аль нэгээр нь хүлээн авахад хангалттай:
- www.mmo.mn/files хэсэгт (сургуулийн эрхээр нэвтэрсэн үед харагдана).
- Сургуулийн удирдлагын mmo.mn-д бүртгэлтэй имэйл хаягаар.
- Аймаг, дүүргийн боловсролын газрын олимпиад хариуцсан мэргэжилтнээр дамжуулан.
- Сэдвийн нууцлал. Олимпиад итгэлцэл дээр суурилдаг. Сэдвийг олимпиад дуустал ямар нэг байдлаар задруулахгүй, сурагчид бие биеэсээ хуулахгүй байх нөхцөлийг бүрдүүлэх нь зохион байгуулагч багш нарын үүрэг.
- Бодолт эхлэхээс өмнө сурагчдад дүрмийг сануулна: утас, тооны машин хэрэглэхгүй; хамтарч бодохгүй; хариултын хуудсанд ID, нэр, хариугаа тод бичнэ.
- Хугацаа дуусмагц хариултын хуудсыг хураан авч, албан ёсны дүн гартал битүүмжлэн хадгална. Дүнгийн маргааныг сургуулийн ажлын хэсгээр дамжуулан, хариултын хуудсыг үндэслэн шийдвэрлэнэ.
Олимпиадын дараа
- Татсан Excel загварын бодлого тус бүрийн баганад сурагчдын хариултыг шивж, сургуулийн хуудасны «Системд хуулах» товчоор оруулна. ID багана болон файлын бүтцийг өөрчлөхгүй. Өмнөх жилүүдэд дүн солигдсон алдааны ихэнх нь сурагчийн ID буруу шивэгдсэнээс үүссэн тул ID-г хариултын хуудастай тулгаж шалгана уу.
- Хариултыг 10-р сарын 29-ний 17:30-аас өмнө системд оруулж дуусгана. Хугацаа хоцорсон хариултыг хүлээн авахгүй. Сүүлийн цагт систем ачаалалтай байдаг тул хариултаа эрт оруулаарай.
- Системд оруулахад техникийн асуудал гарвал бөглөсөн Excel файлаа хугацаанд нь багтааж registration@mmo.mn хаяг руу сургуулийн нэр, ангиллын хамт илгээнэ. Зөвхөн хугацаандаа ирсэн файлыг үндэслэн нөхөж оруулна.
- Оруулсны дараа «Хариулт харах» хэсгээс сурагчдын хариулт зөв орсон эсэхийг нэг бүрчлэн шалгана.
Дүн, II даваанд шалгарах
- Урьдчилсан дүнг 10-р сарын 30-нд mmo.mn-д зарлана. Хариултын шивэлтийн алдааг сургуулийн хүсэлт, хариултын хуудсыг үндэслэн засварласны дараа албан ёсны дүнг зарлана.
- Ангилал бүрд ядаж 1 оноо авсан сурагчдыг сургууль дотроо нийлбэр оноогоор нь их оноотойгоос бага руу жагсааж, сургуулийн квотын тоогоор эхний сурагчид II давааны I шатанд оролцох эрх авна. Квотын сүүлийн байранд оноо тэнцсэн бол тэнцсэн сурагчдад 2-ийн давааны 1-р шатны эрх автоматаар олгохгүй. Сургууль оноо тэнцсэн сурагчдын дунд дотоод шалгаруулалт зохион байгуулж квотод багтаан сонгож болно. 0 оноо авсан сурагчид эрх олгохгүй.
- Квотоо ашиглаагүй сургуулийн үлдсэн эрх өөр сургуульд шилжихгүй. Харин аймаг, дүүргийн зохион байгуулагч босго оноог бууруулах, эсвэл нэг сургуулиас оролцох сурагчийн тоог нэмэх замаар оролцогчийн тоог нэмж болно.
- Эрх авсан сурагчдын жагсаалтыг албан ёсны дүнтэй хамт mmo.mn-д нийтэлнэ. Дэлгэрэнгүйг I давааны журам болон олимпиадын удирдамжаас үзнэ үү.
- II давааны I шат (аймаг, дүүргийн олимпиад) 2027 оны 1-р сарын 14, 15-нд болно.
Холбоо барих
Асуухаасаа өмнө энэ зааврыг бүрэн уншина уу. Бүртгэл, аккаунттай холбоотой асуултаа registration@mmo.mn хаягаар ирүүлнэ үү. Имэйлдээ сургуулийн нэр, аймаг/дүүрэг, сурагчийн ID-г бичвэл хурдан шийдвэрлэнэ.
Сүүлийн засвар: 2026-10-19, Нийтэлсэн: 2026-10-18