ММО-63: II давааны I шатны квотын тооцоо, дутуу квотын дотоод сонгон шалгаруулалт
Эрхэм сургуулийн удирдлага, багш нар аа,
Монголын математикийн 63 дугаар олимпиадын I давааны дүн гарч, II давааны I шат (аймаг/дүүргийн олимпиад)-д оролцох эрхийг сургууль, ангилал тус бүрээр олголоо. Эрхийг дараах аргачлалаар тооцов.
1. Квотыг хэрхэн тооцов
Сургууль бүрийн нийт квот = суурь эрх + нэмэлт эрх.
| Бүрэлдэхүүн | Аймаг | Нийслэлийн дүүрэг |
|---|---|---|
| Суурь эрх (ангилал бүрд, сургууль бүрээс) | 2 | 3 |
| Нэмэлт эрх | Сүүлийн 3 жилийн Top 20-д орсон тооны дундаж, дээш бүхэлчилсэн | Сүүлийн 3 жилийн Top 50-д орсон тооны дундаж, дээш бүхэлчилсэн |
- Нэмэлт эрхийг 2023-2024, 2024-2025, 2025-2026 оны II давааны I шатны олимпиадад тухайн сургуулиас Top 20 (аймаг) / Top 50 (дүүрэг)-д шалгарсан сурагчдын тоогоор тооцов.
- Эрхийг олгохдоо I давааны албан ёсны дүнгээр сургууль дотроо нийлбэр оноогоор эрэмбэлж, нийт квотын хэмжээгээр эхний сурагчдыг сонгов.
- 0 оноотой сурагч хасагдана.
- Квотын зааг дээр оноо тэнцсэн бол «тэнцвэл цөөнийг сонгоно» зарчмаар тэнцсэн бүлгийг бүтнээр нь хасна.
Суурь ба нэмэлт гэсэн ялгаа нь зөвхөн квотыг тогтоох тооцоонд байна. Эрх олгогдсоны дараа бүх сурагч ижил эрхтэй бөгөөд I давааны дүнд «2.1 эрх сургуулиас» гэж тэмдэглэгдсэн.
Квотын задаргаа:
- Аймаг/дүүрэг, ангиллын нэгдсэн дүн: https://www.mmo.mn/olympiads/round2-quota-summary/?year=63
- Сургууль тус бүрийн задаргаа: https://www.mmo.mn/olympiads/round2-quota/?year=63
- I давааны дүн: C — 279, D — 280, E — 281, F — 282
2. Дутуу квотын дотоод сонгон шалгаруулалт
Квотын зааг дээр оноо тэнцсэнээс шалтгаалж эрх бүрэн дүүрээгүй сургуулиуд дутуу эрхийнхээ хэмжээнд дотоод сонгон шалгаруулалт хийж болно.
Чухал: Нэмэлт сонгон шалгаруулалтыг зөвхөн оноо тэнцсэн, эрх аваагүй хамгийн өндөр оноотой сурагчдын дунд хийнэ. Квотын заагт хүрээгүй, оноо багатай сурагчдыг оруулахгүй. I даваанд оролцогчийн тоо квотоос цөөн байсан тохиолдолд нөхөх сурагч байхгүй тул эрх нэмэгдэхгүй.
Шалгаруулалт хийгээгүй тохиолдолд хорооноос эрх нөхөж олгохгүй.
Дутуу квот бүхий сургуулиуд 2026 оны 11 дүгээр сарын 30-ны өдрийн 23:59 хүртэл дотоод сонгон шалгаруулалт хийж, шалгарсан сурагчдын нэрсийг registration@mmo.mn хаягаар ирүүлнэ.
Ирүүлэх мэдээлэл:
- Зөвхөн өөрийн сургуулийн нийт квотоос дутуу байгаа эрхийн хэмжээнд;
- Сурагч mmo.mn-д тухайн сургуулийн бүртгэлтэй байх;
- Ангилал, ID, овог, нэр баганатай Excel, CSV эсвэл захидлын биед.
| Ангилал | ID | Овог | Нэр |
|---|---|---|---|
| C | 123456 | Бат | Тэмүүлэн |
Захидлын гарчиг: «ММО-63 II даваа I шат — дотоод сонгон шалгаруулалт — <Сургуулийн нэр>».
Ирүүлсэн нэрсийг сургуулийн квот, mmo.mn-ийн бүртгэлтэй тулгаж шалгаад II давааны I шатны группт нэмнэ. Квотоос хэтэрсэн, хугацаа хэтэрсэн нэрсийг хүлээж авахгүй.
Сургуулийн нийт квотыг Квотын дэвтэрээс, автоматаар шалгарсан сурагчдын тоог I давааны дүнгээс харж, дутуу эрхийн тоог тодорхойлно уу. Тодорхойгүй бол registration@mmo.mn хаягаар лавлана уу.
Анхаар: I давааны шалгаруулалттай холбоотой гомдлыг тухайн сургуульд гаргана. Монголын математикийн олимпиадын хороо (ММОХ) эдгээр гомдлыг шууд хүлээн авах боломжгүй. Дүн хараахан эцэслэгдээгүй байгаа тул өөрчлөгдөж болох ба эцсийн дүнг албан ёсоор зарлана.
Сүүлийн засвар: 2026-10-31, Нийтэлсэн: 2026-10-31